ਜਲੰਧਰ (ਵਿੱਕੀ ਸੂਰੀ) : ਜਲੰਧਰ ਦੇ ਨੌਜਵਾਨ ਅਤੇ ਉਭਰਦੇ ਬੈਡਮਿੰਟਨ ਖਿਡਾਰੀ ਮਾਨਿਆ ਰਲਹਨ ਨੇ ਫਰਵਰੀ ਮਹੀਨੇ ਹਾਰੇਲਮ ਅਤੇ ਬਰਲਿਨ ਵਿਖੇ ਹੋਣ ਜਾ ਰਹੇ ਵੱਕਾਰੀ ਡੱਚ ਅਤੇ ਜਰਮਨ ਜੂਨੀਅਰ ਇੰਟਰਨੈਸ਼ਨਲ ਗ੍ਰੇਡ ਪ੍ਰੀ ਲਈ ਚੁਣ ਕੇ ਪੰਜਾਬ ਦਾ ਮਾਣ ਵਧਾਇਆ ਹੈ। ਉਹ ਪੰਜਾਬ ਦੀ ਇਕਲੌਤੀ ਖਿਡਾਰਨ ਹੈ ਜਿਸ ਨੂੰ ਇਸ ਵੱਕਾਰੀ ਟੂਰਨਾਮੈਂਟ ਲਈ ਚੁਣਿਆ ਗਿਆ ਹੈ। ਉਹ ਜਲੰਧਰ ਦੀ ਪਹਿਲੀ ਮਹਿਲਾ ਖਿਡਾਰਨ ਹੈ ਜਿਸ ਨੂੰ ਕਿਸੇ ਅੰਤਰਰਾਸ਼ਟਰੀ ਟੂਰਨਾਮੈਂਟ ਵਿੱਚ ਭਾਰਤ ਦੀ ਨੁਮਾਇੰਦਗੀ ਕਰਨ ਦਾ ਮੌਕਾ ਮਿਲਿਆ ਹੈ। ਉਨ੍ਹਾਂ ਨੂੰ ਸਕੱਤਰ, ਡੀ.ਬੀ.ਏ., ਜਲੰਧਰ ਸ੍ਰੀ ਰਿਤਿਨ ਖੰਨਾ ਨੇ ਸਨਮਾਨਿਤ ਕੀਤਾ। ਉਸਨੇ ਇਸ ਸ਼ਾਨਦਾਰ ਪ੍ਰਾਪਤੀ ਲਈ ਮਾਨਿਆ, ਉਸਦੇ ਮਾਪਿਆਂ ਅਤੇ ਰੱਤੀ ਬੈਡਮਿੰਟਨ ਅਕੈਡਮੀ ਦੇ ਕੋਚਾਂ ਦੇ ਬੇਮਿਸਾਲ ਯਤਨਾਂ ਦੀ ਸ਼ਲਾਘਾ ਕੀਤੀ। ਉਨ੍ਹਾਂ ਨੂੰ ਦੋਆਬਾ ਕਾਲਜ ਦੇ ਪ੍ਰਿੰਸੀਪਲ ਡਾ. ਪਰਦੀਪ ਭੰਡਾਰੀ ਦੇ ਨਾਲ ਪ੍ਰੋ: ਸੰਦੀਪ ਚਾਹਲ ਨੇ ਗੁਲਦਸਤਾ ਭੇਂਟ ਕੀਤਾ। ਉਨ੍ਹਾਂ ਬਾਕੀ ਸਾਰੇ ਖਿਡਾਰੀਆਂ ਨੂੰ ਵੀ ਮਾਨੀਆ ਦੇ ਯਤਨਾਂ ਤੋਂ ਸਿੱਖਣ ਦੀ ਅਪੀਲ ਕੀਤੀ। ਸ੍ਰੀ ਸਚਿਨ ਰੱਤੀ, ਸਾਬਕਾ ਅੰਤਰਰਾਸ਼ਟਰੀ ਖਿਡਾਰੀ ਅਤੇ ਰੱਤੀ ਬੈਡਮਿੰਟਨ ਅਕੈਡਮੀ ਦੇ ਮੁੱਖ ਕੋਚ ਨੇ ਇਸ ਪ੍ਰਾਪਤੀ ਲਈ ਆਪਣੀਆਂ ਭਾਵਨਾਵਾਂ ਸਾਂਝੀਆਂ ਕੀਤੀਆਂ ਅਤੇ ਐਸੋਸੀਏਸ਼ਨਾਂ ਅਤੇ ਸਪਾਂਸਰਾਂ ਨੂੰ ਬੈਡਮਿੰਟਨ ਦੇ ਸਮਰਥਨ ਵਿੱਚ ਅੱਗੇ ਆਉਣ ਦੀ ਅਪੀਲ ਕੀਤੀ। ਮਾਨਿਆ ਦੇ ਕੋਚ ਸ਼੍ਰੀ ਸਚਿਨ ਰੱਤੀ, ਸ਼੍ਰੀ ਗਗਨ ਰੱਤੀ, ਹਰਜਿੰਦਰ ਵੜੈਚ ਅਤੇ ਸ਼੍ਰੀ ਵਰੁਣ ਕੁਮਾਰ ਨੇ ਮਾਨਿਆ ਨੂੰ ਉਸਦੇ ਭਵਿੱਖ ਦੇ ਯਤਨਾਂ ਲਈ ਅਸ਼ੀਰਵਾਦ ਦਿੱਤਾ। ਇਸ ਮਾਣਮੱਤੇ ਅਤੇ ਯਾਦਗਾਰੀ ਪਲ ਲਈ ਸ੍ਰੀ ਧੀਰਜ ਸ਼ਰਮਾ, ਅੰਮ੍ਰਿਤਪਾਲ ਅਤੇ ਵੱਖ-ਵੱਖ ਖਿਡਾਰੀਆਂ ਦੇ ਮਾਪੇ ਵਿਸ਼ੇਸ਼ ਤੌਰ ‘ਤੇ ਇਕੱਠੇ ਹੋਏ।
