ਨਵੀਂ ਦਿੱਲੀ — ਹੁਣ ਅਰੋਗਿਆ ਸੇਤੂ ਵਿਚ ਇੱਕ ਨਵਾਂ ਫ਼ੀਚਰ ਸ਼ਾਮਲ ਕੀਤਾ ਗਿਆ ਹੈ। ਇਸ ਦੇ ਨਾਲ ਹੀ ਹੁਣ ਅਰੋਗਿਆ ਸੇਤੂ ਐਪ ਵਿਚ ਉਪਭੋਗਤਾ ਦਾ ਸਿਹਤ ਡਾਟਾ ਤੀਜੀ ਧਿਰ ਦੇ ਐਪਸ ਨਾਲ ਸਾਂਝਾ ਕੀਤਾ ਜਾ ਸਕੇਗਾ। ਆਓ ਜਾਣਦੇ ਹਾਂ ਕੁੱਝ ਖਾਸ ਗੱਲਾਂ। ਦੱਸਣਯੋਗ ਹੈ ਕਿ ਅਰੋਗਿਆ ਸੇਤੂ ਲਈ ਇਕ ਨਵਾਂ ਅਪਡੇਟ ਜ਼ਾਰੀ ਕੀਤਾ ਗਿਆ ਹੈ, ਜੋ ਹੁਣ ਪਲੇਅ ਅਤੇ ਐਪ ਸਟੋਰ ‘ਤੇ ਉਪਲੱਬਧ ਹੈ। ਨਵੀਂ ਵਿਸ਼ੇਸ਼ਤਾ ਬਾਰੇ ਗੱਲ ਕਰੀਏ ਤਾਂ ਨਿੱਜੀ ਮਾਮਲੇ ਵਿਚ ਇਸ ਨੂੰ ਵਧੀਆ ਮੰਨਿਆ ਜਾ ਸਕਦਾ ਹੈ। ਐਪ ਅਪਡੇਟ ਹੋਣ ਤੋਂ ਬਾਅਦ ਹੁਣ ਯੂਜ਼ਰਸ ਅਰੋਗਿਆ ਸੇਤੂ ਤੋਂ ਆਪਣਾ ਅਕਾਉਂਟ ਡਿਲੀਟ ਕਰ ਸਕਣਗੇ। ਸਿਹਤ ਡਾਟਾ ਕਿਸੇ ਹੋਰ ਐਪ ਨਾਲ ਸਾਂਝਾ ਕੀਤਾ ਜਾ ਸਕੇਗਾ। ਇਸ ਦੇ ਲਈ ਤੁਹਾਨੂੰ ਸੈਟਿੰਗਜ਼ ਨੂੰ ਬਦਲਣਾ ਪਏਗਾ। ਭਾਵ ਇਹ ਹੈ ਕਿ ਜੇ ਤੁਸੀਂ ਚਾਹੁੰਦੇ ਹੋ, ਤਾਂ ਤੁਸੀਂ ਸੈਟਿੰਗ ਨੂੰ ਬਦਲ ਕੇ ਅਰੋਗਿਆ ਸੇਤੂ ਦੇ ਡਾਟਾ ਨੂੰ ਦੂਜੇ ਐਪਸ ਨਾਲ ਸਾਂਝਾ ਕਰਨ ਦੀ ਇਜਾਜ਼ਤ ਦੇ ਸਕਦੇ ਹੋ।
ਇੰਝ ਡਿਲੀਟ ਕਰਨਾ ਹੈ ਅਰੋਗਿਆ ਸੇਤੂ ਐਪ ਤੋਂ ਖੁੱਦ ਦਾ ਖਾਤਾ
ਇਸ ਦੇ ਲਈ ਸਭ ਤੋਂ ਪਹਿਲਾਂ ਇਹ ਯਾਦ ਰੱਖੋ ਕਿ ਤੁਸੀਂ ਅਰੋਗਿਆ ਸੇਤੂ ਤੋਂ ਆਪਣਾ ਖਾਤਾ ਡਿਲੀਟ ਕਰ ਰਹੇ ਹੋ, ਪਰ ਤੁਹਾਡਾ ਡਾਟਾ ਸਰਕਾਰੀ ਸਰਵਰ ਵਿਚ ਸਟੋਰ ਹੈ। ਇਹ ਡਾਟਾ ਤੁਹਾਡੇ ਖਾਤਾ ਡਿਲੀਟ ਕਰਨ ਤੋਂ 30 ਦਿਨਾਂ ਬਾਅਦ ਸਰਕਾਰੀ ਸਰਵਰ ਤੋਂ ਹਟਾ ਦਿੱਤਾ ਜਾਵੇਗਾ। ਖਾਤੇ ਨੂੰ ਡਿਲੀਟ ਕਰਨ ਲਈ ਤੁਸੀਂ ਐਪ ਦੇ ਹੈਮਬਰਗਰ ਮੈਨਿਊ ‘ਤੇ ਜਾ ਸਕਦੇ ਹੋ, ਜਿਥੇ ਆਮ ਤੌਰ ‘ਤੇ ਤਿੰਨ ਲਾਈਨਾਂ ਬਣੀਆਂ ਹੁੰਦੀਆਂ ਹਨ। ਇਹ ਖੱਬੇ ਕੋਨੇ ਵਿਚ ਮਿਲ ਜਾਵੇਗਾ। ਇੱਥੇ ਤੁਹਾਨੂੰ ‘ਮੇਰਾ ਖਾਤਾ ਮਿਟਾਓ ਦਾ ਵਿਕਲਪ ਮਿਲੇਗਾ ਜਿਸ ਦੀ ਤੁਸੀਂ ਚੋਣ ਕਰ ਸਕਦੇ ਹੋ। ਇਹ ਐਂਡਰਾਇਡ ਉਪਭੋਗਤਾਵਾਂ ਲਈ ਹੈ।
ਆਈਫੋਨ ਉਪਭੋਗਤਾ ਐਪ ਸੈਟਿੰਗਸ ਵਿਚ ਡਿਲੀਟ_ਅਕਾਉਂਟ_ਫਾਈਲ ਵਿਕਲਪ ਦੀ ਚੋਣ ਕਰਨ ਅਤੇ ਆਪਣਾ ਫੋਨ ਨੰਬਰ ਦਾਖਲ ਕਰਨ। ਇਸ ਤੋਂ ਬਾਅਦ ਤੁਹਾਡਾ ਖਾਤਾ ਡਿਲੀਟ ਕਰ ਦਿੱਤਾ ਜਾਏਗਾ। ਖਾਸ ਗੱਲ ਇਹ ਹੈ ਕਿ ਇਸ ਤੋਂ ਪਹਿਲਾਂ ਵੀ ਅਰੋਗਿਆ ਸੇਤੂ ਦੀ ਨਿੱਜਤਾ ਨੂੰ ਲੈ ਕੇ ਕਈ ਸਵਾਲ ਖੜ੍ਹੇ ਕੀਤੇ ਗਏ ਸਨ। ਸਾਈਬਰ ਸੁਰੱਖਿਆ ਅਤੇ ਗੋਪਨੀਯਤਾ ਮਾਹਰਾਂ ਨੇ ਸਰਕਾਰ ਨੂੰ ਅਰੋਗਿਆ ਸੇਤੂ ਦਾ ਸਰੋਤ ਕੋਡ ਜ਼ਾਰੀ ਕਰਨ ਲਈ ਕਿਹਾ ਹੈ। ਸਿਰਫ ਇਹ ਹੀ ਨਹੀਂ ਡਾਟਾ ਨੂੰ ਮਿਟਾਉਣ, ਖਾਤੇ ਨੂੰ ਮਿਟਾਉਣ ਅਤੇ ਜੀਪੀਐਸ ਐਕਸੈਸ ਨੂੰ ਲੈ ਕੇ ਵੀ ਸਵਾਲ ਖੜ੍ਹੇ ਕੀਤੇ ਗਏ ਸਨ। ਹਾਲਾਂਕਿ ਕੁੱਝ ਸਮੇਂ ਬਾਅਦ ਅਰੋਗਿਆ ਸੇਤੂ ਐਪ ਦਾ ਸਰੋਤ ਕੋਡ ਜਨਤਕ ਕਰ ਦਿੱਤਾ ਗਿਆ। ਇਸ ਤੋਂ ਬਾਅਦ ਸਰਕਾਰ ਵੱਲੋਂ ਇਸ ਐਪ ਵਿਚੋਂ ਅਕਾਊਂਟ ਡਿਲੀਟ ਕਰਨ ਦਾ ਫੀਚਰ ਵੀ ਦਿੱਤਾ ਗਿਆ ਹੈ।