ਨਵੀਂ ਦਿੱਲੀ -ਵੰਦੇ ਭਾਰਤ ਮੈਟਰੋ ਦੇਸ਼ ਦੇ ਕਈ ਵੱਡੇ ਸ਼ਹਿਰਾਂ ਵਿਚਕਾਰ ਚੱਲਦੀ ਦਿਖਾਈ ਦੇਵੇਗੀ। ਪਹਿਲੀ ਵਾਰ ਇਸ ਟਰੇਨ ਦੀ ਝਲਕ ਵੀ ਸਾਹਮਣੇ ਆਈ ਹੈ। ਇਸ ਟਰੇਨ ਦਾ ਇਸ ਸਾਲ ਜੁਲਾਈ ‘ਚ ਟ੍ਰਾਇਲ ਕੀਤਾ ਜਾਵੇਗਾ। ਵੰਦੇ ਭਾਰਤ ਮੈਟਰੋ ਕੋਚਾਂ ਦਾ ਨਿਰਮਾਣ ਪੰਜਾਬ ਦੇ ਕਪੂਰਥਲਾ ’ਚ ਰੇਲ ਕੋਚ ਫੈਕਟਰੀ ’ਚ ਕੀਤਾ ਗਿਆ ਹੈ
ਰੇਲਵੇ ਤੋਂ ਪ੍ਰਾਪਤ ਜਾਣਕਾਰੀ ਅਨੁਸਾਰ ਰੇਲਵੇ ਸ਼ੁਰੂ ’ਚ ਅਜਿਹੀਆਂ 50 ਦੇ ਕਰੀਬ ਟਰੇਨਾਂ ਬਣਾਏਗਾ। ਹੌਲੀ-ਹੌਲੀ ਇਸ ਦੀ ਗਿਣਤੀ ਵਧਾ ਕੇ 400 ਕਰਨ ਦੀ ਯੋਜਨਾ ਹੈ। ਵੰਦੇ ਭਾਰਤ ਮੈਟਰੋ ਟਰੇਨਾਂ 100 ਕਿਲੋਮੀਟਰ ਤੋਂ 250 ਕਿਲੋਮੀਟਰ ਤੱਕ ਦਾ ਸਫਰ ਤੈਅ ਕਰ ਸਕਣਗੀਆਂ। ਇਸ ਟ੍ਰੇਨ ਵਿੱਚ ਡਿਫਾਲਟ ਸੰਰਚਨਾ ਦੇ ਰੂਪ ਵਿੱਚ 12 ਕੋਚ ਹਨ। ਪਰ ਇਸ ਨੂੰ ਵਧਾ ਕੇ 16 ਕੋਚ ਕੀਤਾ ਜਾ ਸਕਦਾ ਹੈ। ਵੰਦੇ ਭਾਰਤ ਮੈਟਰੋ ਇੱਕ ਅਰਧ ਹਾਈ ਸਪੀਡ ਇਲੈਕਟ੍ਰਿਕ ਮਲਟੀਪਲ ਯੂਨਿਟ ਟ੍ਰੇਨ ਹੈ ਜੋ ਭਾਰਤੀ ਰੇਲਵੇ ਦੁਆਰਾ ਵਿਕਸਤ ਕੀਤੀ ਗਈ ਹੈ। ਇਹ ਟ੍ਰੇਨ ਵੰਦੇ ਭਾਰਤ ਟ੍ਰੇਨ ਦਾ ਮੈਟਰੋ ਸੰਸਕਰਣ ਹੈ।
ਜਾਣਕਾਰੀ ਮੁਤਾਬਕ ਇਹ ਟਰੇਨ ਐਂਟੀ-ਕੋਲੀਜ਼ਨ ਸਿਸਟਮ ਨਾਲ ਲੈਸ ਹੈ, ਜੋ ਇਸ ਨੂੰ ਅੱਗੇ ਜਾ ਰਹੀ ਟਰੇਨ ਨਾਲ ਟਕਰਾਉਣ ਤੋਂ ਰੋਕਦੀ ਹੈ। ਇਸ ਵਿੱਚ ਏਸੀ, ਆਟੋਮੈਟਿਕ ਦਰਵਾਜ਼ੇ, ਐਲਈਡੀ ਲਾਈਟਾਂ, ਵਾਈ-ਫਾਈ, ਸੀਸੀਟੀਵੀ ਕੈਮਰੇ, ਟਾਇਲਟ ਅਤੇ ਯਾਤਰੀ ਸੂਚਨਾ ਪ੍ਰਣਾਲੀ ਸਮੇਤ ਕਈ ਸਹੂਲਤਾਂ ਹਨ। ਵੰਦੇ ਭਾਰਤ ਨੂੰ ਦਿੱਲੀ-ਮੇਰਠ, ਦਿੱਲੀ-ਗਾਜ਼ੀਆਬਾਦ, ਮੁੰਬਈ-ਠਾਣੇ, ਆਗਰਾ-ਮਥੁਰਾ ਵਰਗੇ ਵਿਅਸਤ ਰੂਟਾਂ ‘ਤੇ ਸ਼ੁਰੂ ਕਰਨ ਦੀ ਯੋਜਨਾ ਹੈ।