ਹੁਣ ਦੇਸ਼ ਵਿੱਚ ਹਾਈਟੈਕ ਹਾਈਵੇਅ ਅਤੇ ਐਕਸਪ੍ਰੈਸਵੇਅ ਬਣਾਏ ਜਾ ਰਹੇ ਹਨ। ਇਨ੍ਹਾਂ ਵਿੱਚ 8 ਲੇਨ, 4 ਲੇਨ ਅਤੇ ਐਲੀਵੇਟਿਡ ਐਕਸਪ੍ਰੈਸ ਵੇਅ ਸ਼ਾਮਲ ਹਨ। ਖਾਸ ਗੱਲ ਇਹ ਹੈ ਕਿ ਇਨ੍ਹਾਂ ਐਕਸਪ੍ਰੈੱਸ ਵੇਅ ‘ਤੇ ਆਟੋਮੈਟਿਕ ਟੋਲ ਸਿਸਟਮ ਸਮੇਤ ਕਈ ਹੋਰ ਸੁਵਿਧਾਵਾਂ ਸ਼ਾਮਲ ਹਨ। ਇਸ ਸੰਦਰਭ ‘ਚ ਦੇਸ਼ ‘ਚ ਇਕ ਹਾਈਵੇਅ ਪ੍ਰਾਜੈਕਟ ‘ਤੇ ਕੰਮ ਕੀਤਾ ਜਾ ਰਿਹਾ ਹੈ, ਜਿਸ ‘ਚ 85 ਕਿਲੋਮੀਟਰ ਲੰਬੀ ਸੜਕ ਜ਼ਮੀਨਦੋਜ਼ ਹੋਵੇਗੀ।ਹਿਮਾਚਲ ਪ੍ਰਦੇਸ਼ ਵਿੱਚ 85 ਕਿਲੋਮੀਟਰ ਚਾਰ ਮਾਰਗੀ ਜ਼ਮੀਨ ਦੇ ਹੇਠਾਂ ਤਿਆਰ ਹੋਵੇਗੀ। ਇਸ ਚਾਰ ਮਾਰਗੀ ਪ੍ਰੋਜੈਕਟ ਲਈ, NHAI ਨੇ ਕੇਂਦਰ ਸਰਕਾਰ ਅਤੇ ਵਾਤਾਵਰਣ ਮੰਤਰਾਲੇ ਤੋਂ ਲੋੜੀਂਦੀਆਂ ਪ੍ਰਵਾਨਗੀਆਂ ਪ੍ਰਾਪਤ ਕਰ ਲਈਆਂ ਹਨ। 85 ਕਿਲੋਮੀਟਰ ਲੰਬੇ ਇਸ ਹਾਈਵੇਅ ਵਿੱਚ ਕਈ ਸੁਰੰਗਾਂ ਬਣਾਈਆਂ ਜਾਣਗੀਆਂ।ਦਰਅਸਲ, ਨੈਸ਼ਨਲ ਹਾਈਵੇਅ ਅਥਾਰਟੀ ਆਫ ਇੰਡੀਆ ਹਿਮਾਚਲ ਪ੍ਰਦੇਸ਼ ਦੇ ਕਈ ਹਾਈਵੇਅ ‘ਤੇ 68 ਸੁਰੰਗਾਂ ਬਣਾਉਣ ਜਾ ਰਹੀ ਹੈ। ਇਨ੍ਹਾਂ ‘ਚੋਂ 11 ਸੁਰੰਗਾਂ ‘ਤੇ ਕੰਮ ਪੂਰਾ ਹੋ ਚੁੱਕਾ ਹੈ ਜਦਕਿ 27 ਸੁਰੰਗਾਂ ‘ਤੇ ਕੰਮ ਚੱਲ ਰਿਹਾ ਹੈ। ਇਨ੍ਹਾਂ ਚਾਰ ਮਾਰਗੀ ਹਾਈਵੇਅ ਦੇ ਨਿਰਮਾਣ ਲਈ 50 ਫੀਸਦੀ ਤੋਂ ਵੱਧ ਵਿਸਤ੍ਰਿਤ ਪ੍ਰੋਜੈਕਟ ਰਿਪੋਰਟ ਤਿਆਰ ਕੀਤੀ ਜਾ ਚੁੱਕੀ ਹੈ।
ਕਿਉਂ ਲਿਆ ਗਿਆ ਸੁਰੰਗ ਬਣਾਉਣ ਦਾ ਫੈਸਲਾ?
ਦਰਅਸਲ ਪਿਛਲੇ ਸਾਲ ਹਿਮਾਚਲ ਪ੍ਰਦੇਸ਼ ‘ਚ ਬਾਰਿਸ਼ ਦੌਰਾਨ ਆਈ ਤਬਾਹੀ ਕਾਰਨ ਕੀਰਤਪੁਰ-ਮਨਾਲੀ ਹਾਈਵੇਅ ‘ਤੇ ਕੁੱਲੂ ਅਤੇ ਮੰਡੀ ‘ਚ ਸਭ ਤੋਂ ਜ਼ਿਆਦਾ ਨੁਕਸਾਨ ਹੋਇਆ ਸੀ। ਇਸ ਤੋਂ ਇਲਾਵਾ ਪਠਾਨਕੋਟ-ਮੰਡੀ ਅਤੇ ਪਿੰਜੌਰ-ਨਾਲਾਗੜ੍ਹ ਵੀ ਇਸ ਤਬਾਹੀ ਨਾਲ ਪ੍ਰਭਾਵਿਤ ਹੋਏ। ਇਨ੍ਹਾਂ ਹਾਈਵੇਅ ਨੂੰ ਹੋਏ ਨੁਕਸਾਨ ਤੋਂ ਬਾਅਦ NHAI ਨੂੰ ਹਾਈਵੇਅ ਦਾ ਸਰਵੇ ਕਰਕੇ ਸੁਰੰਗ ਬਣਾਉਣ ਦੇ ਸੁਝਾਅ ਮਿਲੇ ਸਨ। ਇਨ੍ਹਾਂ ਸੁਝਾਵਾਂ ਤੋਂ ਬਾਅਦ ਨੈਸ਼ਨਲ ਹਾਈਵੇਅ ਅਥਾਰਟੀ ਨੇ ਚਾਰ ਮਾਰਗੀ ਸੈਕਸ਼ਨ ਦੇ ਜ਼ਿਆਦਾਤਰ ਹਿੱਸੇ ਨੂੰ ਸੁਰੰਗ ਰਾਹੀਂ ਲੰਘਾਉਣ ਦੀ ਤਿਆਰੀ ਕਰ ਲਈ ਹੈ।ਇਨ੍ਹਾਂ ਸੁਰੰਗਾਂ ਦੇ ਬਣਨ ਨਾਲ ਸੂਬੇ ਦੀਆਂ ਸਾਰੀਆਂ ਚਾਰ ਲੇਨਾਂ ਦੀ ਦੂਰੀ 126 ਕਿਲੋਮੀਟਰ ਘੱਟ ਜਾਵੇਗੀ ਅਤੇ ਯਾਤਰੀਆਂ ਦੇ ਸਫ਼ਰ ਦੇ ਸਮੇਂ ਵਿੱਚ 13 ਘੰਟੇ ਦੀ ਕਮੀ ਆਵੇਗੀ। ਇਸ ਤੋਂ ਇਲਾਵਾ ਹਿਮਾਚਲ ‘ਚ ਬਰਫਬਾਰੀ ਅਤੇ ਮੀਂਹ ਕਾਰਨ ਆਵਾਜਾਈ ਪ੍ਰਭਾਵਿਤ ਨਹੀਂ ਹੋਵੇਗੀ। ਹਿਮਾਚਲ ਵਿੱਚ ਪਠਾਨਕੋਟ-ਮੰਡੀ, ਕਾਲਕਾ-ਸ਼ਿਮਲਾ, ਸ਼ਿਮਲਾ-ਮਟੌਰ, ਕੀਰਤਪੁਰ-ਮਨਾਲੀ ਅਤੇ ਪਿੰਜੌਰ-ਨਾਲਾਗੜ੍ਹ ਨੈਸ਼ਨਲ ਹਾਈਵੇਅ ਦੇ ਨਿਰਮਾਣ ਦਾ ਕੰਮ ਚੱਲ ਰਿਹਾ ਹੈ। ਇਨ੍ਹਾਂ ਹਾਈਵੇਅ ‘ਤੇ 68 ਸੁਰੰਗਾਂ ਬਣਾਈਆਂ ਜਾ ਰਹੀਆਂ ਹਨ। ਇਨ੍ਹਾਂ ਵਿੱਚੋਂ ਕੀਰਤਪੁਰ-ਮਨਾਲੀ ਵਿੱਚ 41 ਕਿਲੋਮੀਟਰ ਲੰਬੇ ਹਾਈਵੇਅ ’ਤੇ 28 ਸੁਰੰਗਾਂ ਦਾ ਪ੍ਰਸਤਾਵ ਹੈ।