ਫਰੀਦਾਬਾਦ ਵਿੱਚ ਚੀਨੀ ਡੋਰ ਦੇ 10 ਬੰਡਲ ਜ਼ਬਤ

ਫਰੀਦਾਬਾਦ (ਅਰਸ਼ਦੀਪ ਸਿੰਘ ਕਾਲੜਾ) : ਐਤਵਾਰ ਨੂੰ ਚੀਨੀ ਮਾਂਜੇ ਦੀ ਲਪੇਟ ਵਿੱਚ ਆਉਣ ਕਾਰਨ ਇੱਕ ਨੌਜਵਾਨ ਦੀ ਮੌਤ ਤੋਂ ਬਾਅਦ ਫਰੀਦਾਬਾਦ ਪ੍ਰਸ਼ਾਸਨ ਹਰਕਤ ਵਿੱਚ ਆ ਗਿਆ ਹੈ। ਪੁਲਿਸ ਅਤੇ ਮੁੱਖ ਮੰਤਰੀ ਫਲਾਇੰਗ ਟੀਮ ਨੇ ਪਾਰਵਤੀਆ ਚੌਕੀ ਇਲਾਕੇ ਵਿੱਚ ਛਾਪੇਮਾਰੀ ਕਰਕੇ ਪਾਬੰਦੀਸ਼ੁਦਾ ਚੀਨੀ ਮਾਂਜੇ ਦੇ 10 ਵੱਡੇ ਬੰਡਲ ਬਰਾਮਦ ਕੀਤੇ ਹਨ। ਇਸ ਮਾਮਲੇ ਵਿੱਚ ਪੁਲਿਸ ਨੇ ਦੋ ਦੁਕਾਨਦਾਰਾਂ ਨੂੰ ਵੀ ਗ੍ਰਿਫ਼ਤਾਰ ਕੀਤਾ ਹੈ।

ਜਾਣਕਾਰੀ ਮੁਤਾਬਕ ਪੁਲਿਸ ਅਤੇ ਮੁੱਖ ਮੰਤਰੀ ਫਲਾਇੰਗ ਟੀਮ ਨੂੰ ਸੂਚਨਾ ਮਿਲੀ ਸੀ ਕਿ ਭਡਾਨਾ ਚੌਕ ਅਤੇ ਕੇਡੀ ਪਬਲਿਕ ਸਕੂਲ ਨੇੜੇ ਪਾਬੰਦੀਸ਼ੁਦਾ ਚੀਨੀ ਮਾਂਜਾ ਗੁਪਤ ਢੰਗ ਨਾਲ ਵੇਚਿਆ ਜਾ ਰਿਹਾ ਹੈ। ਸੂਚਨਾ ਮਿਲਣ ਤੋਂ ਬਾਅਦ ਟੀਮ ਨੇ ਨਾਗਲਾ ਰੋਡ ਸਥਿਤ ਕੇਡੀ ਪਬਲਿਕ ਸਕੂਲ ਨੇੜੇ ਯੋਗੇਸ਼ ਦੀ ਦੁਕਾਨ ‘ਤੇ ਛਾਪਾ ਮਾਰਿਆ। ਤਲਾਸ਼ੀ ਦੌਰਾਨ ਦੁਕਾਨ ਤੋਂ ਇੱਕ ਡੱਬੇ ਵਿੱਚ ਰੱਖੇ ਚੀਨੀ ਮਾਂਜੇ ਦੇ ਚਾਰ ਵੱਡੇ ਬੰਡਲ ਬਰਾਮਦ ਹੋਏ।

ਇਸ ਤੋਂ ਬਾਅਦ ਟੀਮ ਨੇ ਭਡਾਨਾ ਚੌਕ ਵਾਸੀ ਅੰਕਿਤ ਦੀ ਦੁਕਾਨ ਦੀ ਵੀ ਤਲਾਸ਼ੀ ਲਈ, ਜਿੱਥੋਂ ਚੀਨੀ ਧਾਗੇ ਦੇ ਛੇ ਵੱਡੇ ਬੰਡਲ ਬਰਾਮਦ ਕੀਤੇ ਗਏ। ਇਸ ਤਰ੍ਹਾਂ ਦੋਵਾਂ ਦੁਕਾਨਾਂ ਤੋਂ ਕੁੱਲ 10 ਬੰਡਲ ਬਰਾਮਦ ਕੀਤੇ ਗਏ।

ਪੁਲਿਸ ਅਨੁਸਾਰ ਬਰਾਮਦ ਕੀਤੇ ਗਏ ਧਾਗੇ ਦੇ ਬੰਡਲਾਂ ‘ਤੇ “ਸਿਰਫ਼ ਉਦਯੋਗਿਕ ਵਰਤੋਂ ਲਈ” ਲਿਖਿਆ ਹੋਇਆ ਸੀ। ਇਸ ਦੇ ਬਾਵਜੂਦ ਦੋਸ਼ ਹੈ ਕਿ ਦੁਕਾਨਦਾਰ ਇਸ ਪਾਬੰਦੀਸ਼ੁਦਾ ਧਾਗੇ ਨੂੰ ਆਮ ਲੋਕਾਂ ਨੂੰ ਵੇਚਣ ਦੀ ਤਿਆਰੀ ਕਰ ਰਹੇ ਸਨ। ਪੁਲਿਸ ਵੱਲੋਂ ਮਾਮਲੇ ਦੀ ਅਗਲੇਰੀ ਜਾਂਚ ਕੀਤੀ ਜਾ ਰਹੀ ਹੈ।