ਕਾਰਤਿਕ ਮਾਸ ਦੀ ਪ੍ਰਭਾਤਫੇਰੀ ਦੌਰਾਨ ਗੁਰੂ ਹਰਗੋਬਿੰਦ ਨਗਰ ’ਚ ਗੂੰਜਿਆ ਰਾਧੇ-ਕ੍ਰਿਸ਼ਨ ਨਾਮ ਦਾ ਸੰਕੀਰਤਨ

ਨੰਦ ਬਾਬਾ ਦੀ ਜੈ, ਯਸ਼ੋਦਾ ਮੈਯਾ ਦੀ ਜੈ ਦੇ ਜੈਕਾਰਿਆਂ ਨਾਲ ਭਗਤੀਮਈ ਹੋਇਆ ਮਾਹੌਲ – ਤਾਪਸ ਪ੍ਰਭੂ

ਜੈ ਗੋਵਿੰਦ, ਜੈ ਗੋਪਾਲ ਦੇ ਉਚਾਰਨਾਂ ਨਾਲ ਗੂੰਜਿਆ ਗੁਰੂ ਹਰਗੋਬਿੰਦ ਨਗਰ – ਹਰਸ਼ ਸ਼ਰਮਾ

ਨਵੀਨ ਪੁਰੀ, ਜਲੰਧਰ। ਸ਼੍ਰੀ ਗੌਰ ਹਰਿ ਸੰਕੀਰਤਨ ਮੰਡਲ ਵੱਲੋਂ ਕਾਰਤਿਕ ਮਾਸ ਦੇ ਪਵਿੱਤਰ ਮੌਕੇ ’ਤੇ ਪ੍ਰਭਾਤਫੇਰੀ ਦਾ ਆਯੋਜਨ ਬੜੀ ਸ਼ਰਧਾ, ਭਾਵਨਾ ਅਤੇ ਉਤਸ਼ਾਹ ਨਾਲ ਗੁਰੂ ਹਰਗੋਬਿੰਦ ਨਗਰ, ਦਿਲਬਾਗ ਨਗਰ ਦੇ ਨੇੜੇ ਦੂਆ ਪਰਿਵਾਰ ਦੇ ਨਿਵਾਸ ਸਥਾਨ ਤੋਂ ਕੀਤਾ ਗਿਆ। ਇਸ ਮੌਕੇ ਵੱਡੀ ਗਿਣਤੀ ਵਿੱਚ ਭਗਤਾਂ ਨੇ ਸ਼ਮੂਲੀਅਤ ਕਰਕੇ ਪ੍ਰਭੂ ਭਗਤੀ ਦਾ ਆਨੰਦ ਮਾਣਿਆ।

ਸੰਕੀਰਤਨ ਦੀ ਸ਼ੁਰੂਆਤ ਸਨੀ ਦੂਆ, ਦੀਪਕ ਸ਼ਰਮਾ, ਵਿਪੁਲ ਸਿਸੋਦੀਆ, ਹਰਸ਼ ਸ਼ਰਮਾ, ਪਾਰਥ ਸਾਰਥੀ ਪ੍ਰਭੂ, ਵਿਸ਼ਾਲ ਢੱਲ, ਰੁਕਮਣੀ ਪ੍ਰਭੂ ਅਤੇ ਗੋਬਿੰਦ ਸ਼ਰਮਾ ਵੱਲੋਂ ਮੰਗਲਾਚਰਨ, ਗੁਰੂ ਵੰਦਨਾ, ਵੈਸ਼ਨਵ ਵੰਦਨਾ ਅਤੇ ਪੰਚਤੱਤਵ ਦੀ ਵੰਦਨਾ ਨਾਲ ਕੀਤੀ ਗਈ। ਇਸ ਉਪਰੰਤ ਭਗਤਾਂ ਨੇ ਠਾਕੁਰ ਜੀ ਨੂੰ ਦੀਪਦਾਨ ਕਰਦੇ ਹੋਏ ਰਾਧਾ ਦਾਮੋਦਰ ਅਸ਼ਟਕਮ ਦਾ ਭਾਵਪੂਰਨ ਸੰਕੀਰਤਨ ਕੀਤਾ।

ਇਸ ਮੌਕੇ ਤਾਪਸ ਪ੍ਰਭੂ ਨੇ ‘ਜੈ ਗੋਵਿੰਦ, ਜੈ ਗੋਪਾਲ’, ‘ਨੰਦ ਬਾਬਾ ਦੀ ਜੈ’ ਅਤੇ ‘ਯਸ਼ੋਦਾ ਮੈਯਾ ਦੀ ਜੈ’ ਦੇ ਮਧੁਰ ਸੰਕੀਰਤਨ ਰਾਹੀਂ ਸਮੂਹ ਸੰਗਤ ਨੂੰ ਪ੍ਰਭੂ ਭਗਤੀ ਵਿੱਚ ਲੀਨ ਕਰ ਦਿੱਤਾ। ਪੂਰਾ ਇਲਾਕਾ ਭਗਤੀਮਈ ਜੈਕਾਰਿਆਂ ਨਾਲ ਗੂੰਜ ਉੱਠਿਆ। ਉੱਥੇ ਹੀ ਵਿਸ਼ਾਲ ਢੱਲ ਨੇ ‘ਨਟਖਟ ਬੰਸੀ ਵਾਲੇ, ਗੋਕੁਲ ਦੇ ਰਾਜਾ’ ਅਤੇ ਹੋਰ ਭਜਨਾਂ ਰਾਹੀਂ ਸੰਗਤ ਨੂੰ ਨੱਚਣ ਲਈ ਮਜਬੂਰ ਕਰ ਦਿੱਤਾ। ਸਾਰੇ ਭਗਤਾਂ ਨੇ ਠਾਕੁਰ ਜੀ ਦੇ ਸਨਮੁੱਖ ਖੂਬ ਨ੍ਰਿਤ ਕੀਤਾ ਅਤੇ ਆਪਣੀ ਸ਼ਰਧਾ ਤੇ ਸਮਰਪਣ ਦਾ ਪ੍ਰਗਟਾਵਾ ਕੀਤਾ।

ਇਹ ਪ੍ਰਭਾਤਫੇਰੀ ਸੁਭਾਸ਼ ਦੂਆ ਦੇ ਨਿਵਾਸ ਸਥਾਨ ਤੋਂ ਹੁੰਦੀ ਹੋਈ ਕਾਲਾ ਭਾਈ, ਦਿਲਬਾਗ ਨਗਰ, ਮੰਜੀਤ ਨਗਰ, ਗੁਰੂ ਹਰਗੋਬਿੰਦ ਨਗਰ ਅਤੇ ਬਸਤੀ ਗੁਜ਼ਾਂ ਦੇ ਆਸ-ਪਾਸ ਦੇ ਕਈ ਘਰਾਂ ਵਿੱਚ ਪਹੁੰਚੀ। ਵੱਖ-ਵੱਖ ਥਾਵਾਂ ’ਤੇ ਪ੍ਰਭੂ ਪ੍ਰੇਮੀਆਂ ਵੱਲੋਂ ਮਹਾਪ੍ਰਭੂ ਜੀ ਦੀ ਪਾਲਕੀ ਦਾ ਫੁੱਲਾਂ ਦੀ ਵਰਖਾ ਅਤੇ ਦੀਪਮਾਲਾ ਨਾਲ ਸ਼ਾਨਦਾਰ ਸਵਾਗਤ ਕੀਤਾ ਗਿਆ।

ਇਸ ਮੰਗਲਮਈ ਪ੍ਰਭਾਤਫੇਰੀ ਨੂੰ ਸਫ਼ਲ ਬਣਾਉਣ ਵਿੱਚ ਪੁਨੀਤ ਠਾਕੁਰ, ਅਸ਼ਵਨੀ ਸੇਠੀ, ਰਾਕੇਸ਼ ਮੱਗੋ, ਆਦਿੱਤਿਆ ਮੱਗੋ, ਰਾਜੇਸ਼ ਦੂਆ, ਗੌਰਵ ਦੂਆ, ਆਕਾਸ਼ ਮਲਹੋਤਰਾ, ਨਿਤਾਈ, ਰਾਕੇਸ਼ ਕਸ਼ਯਪ, ਸਾਗਰ, ਨਿਖਿਲ ਮਹਿਰਾ, ਬੌਬੀ ਮਹਿਤਾ, ਲੱਕੀ, ਅਥਰਵ ਦੂਆ, ਨਿਤਿਨ ਖੁਰਾਣਾ, ਆਰੀਅਨ ਖੁਰਾਣਾ, ਰਾਜੂ, ਰਾਜੀਵ ਅਰੋੜਾ, ਕ੍ਰਿਸ਼ਨ ਲਾਲ ਦੂਆ, ਅਜੈ ਕੁਮਾਰ ਗਾਬਾ, ਰਾਜੀਵ, ਰੋਹਿਤ ਅਰੋੜਾ, ਰਤਨ ਦੂਆ, ਸੋਨਮ ਦੂਆ, ਸੰਜੀਵ ਅਰੋੜਾ, ਰਜਨੀ, ਗੀਤਾ, ਸੋਨਾਲੀ, ਅਦਿਤੀ, ਗੌਰੀ, ਪ੍ਰੀਤੀ, ਅੰਚਲ, ਨਿਸ਼ਾ ਅਤੇ ਪੱਲਵੀ ਸਮੇਤ ਵੱਡੀ ਗਿਣਤੀ ਵਿੱਚ ਭਗਤਾਂ ਨੇ ਸਹਿਯੋਗ ਦਿੱਤਾ।

ਪ੍ਰਭਾਤਫੇਰੀ ਦੇ ਸੰਕੀਰਤਨ ਦੀ ਸਮਾਪਤੀ ਉਪਰੰਤ ਦੂਆ ਪਰਿਵਾਰ ਵੱਲੋਂ ਸਮੂਹ ਸੰਗਤ ਲਈ ਭਗਵਦ ਪ੍ਰਸਾਦ ਦੀ ਵਿਵਸਥਾ ਕੀਤੀ ਗਈ। ਇਸ ਮੌਕੇ ਹਰ ਭਗਤ ਨੇ ਠਾਕੁਰ ਜੀ ਨੂੰ ਦੀਪਦਾਨ ਕਰਕੇ ਕਾਰਤਿਕ ਮਾਸ ਦੇ ਇਸ ਪਵਿੱਤਰ ਉਤਸਵ ਨੂੰ ਸ਼ਰਧਾ ਅਤੇ ਉਤਸ਼ਾਹ ਨਾਲ ਮਨਾਇਆ।