Skip to content
ਜਲੰਧਰ (ਵਿੱਕੀ ਸੂਰੀ) : ਮਹਾਨਗਰ ਵਿੱਚ ਤਿਉਹਾਰੀ ਮੌਸਮ ਦੌਰਾਨ ਭਾਵੇਂ ਪੁਲਿਸ ਨਾਕੇਬੰਦੀ ਕਰਕੇ ਕਾਰਵਾਈ ਕਰਨ ਦੇ ਦਾਅਵੇ ਕਰ ਰਹੀ ਹੈ, ਪਰ ਹਕੀਕਤ ਇਹ ਹੈ ਕਿ ਸਨੇਚਰ (ਝਪਟਮਾਰ) ਬੇਖ਼ੌਫ਼ ਹੋ ਕੇ ਸਾਰਿਆਂ ਦੇ ਸਾਹਮਣੇ ਵਾਰਦਾਤਾਂ ਨੂੰ ਅੰਜਾਮ ਦੇ ਰਹੇ ਹਨ। ਸਨੇਚਰਾਂ ਨੂੰ ਪੁਲਿਸ ਦਾ ਕੋਈ ਡਰ ਨਹੀਂ ਰਹਿ ਗਿਆ। ਤਾਜ਼ਾ ਮਾਮਲਾ ਮੀਠਾਪੁਰ ਦੀ ਰਹਿਣ ਵਾਲੀ ਮਹਿਲਾ ਨਿਰਮਲ ਕੌਰ ਨਾਲ ਸਨੇਚਿੰਗ ਦਾ ਸਾਹਮਣੇ ਆਇਆ ਹੈ, ਜਿੱਥੇ ਮਹਿਲਾ ਦੇ ਕੰਨਾਂ ਤੋਂ ਬਾਲੀਆਂ ਝਪਟ ਕੇ ਬਾਈਕ ਸਵਾਰ ਫਰਾਰ ਹੋ ਗਏ।
ਮਹਿਲਾ ਨੇ ਦੱਸਿਆ ਕਿ ਉਹ ਆਪਣੇ ਚਾਚੇ ਦੇ ਪੁੱਤਰ ਦੇ ਘਰ ਦੇ ਗੇਟ ਦੇ ਬਾਹਰ ਖੜੀ ਸੀ। ਇਸ ਦੌਰਾਨ ਬਾਈਕ ‘ਤੇ ਸਵਾਰ ਦੋ ਨੌਜਵਾਨ ਆਏ ਅਤੇ ਉਸ ਦੇ ਕੰਨਾਂ ਤੋਂ ਬਾਲੀਆਂ ਝਪਟ ਕੇ ਫਰਾਰ ਹੋ ਗਏ। ਇਹ ਘਟਨਾ ਨੇੜਲੇ ਸੀਸੀਟੀਵੀ ਕੈਮਰੇ ਵਿੱਚ ਕੈਦ ਹੋ ਗਈ। ਫੁਟੇਜ ਵਿੱਚ ਸਾਫ਼ ਦਿਖਾਈ ਦੇ ਰਿਹਾ ਹੈ ਕਿ ਦੋ ਬਾਈਕ ਸਵਾਰ ਆਉਂਦੇ ਹਨ, ਮਹਿਲਾ ਦੇ ਕੰਨਾਂ ਤੋਂ ਬਾਲੀਆਂ ਖਿੱਚਦੇ ਹਨ ਅਤੇ ਤੁਰੰਤ ਭੱਜ ਜਾਂਦੇ ਹਨ।
ਘਟਨਾ ਦੇ ਕੁਝ ਸੈਕਿੰਡਾਂ ਤੱਕ ਮਹਿਲਾ ਨੂੰ ਕੁਝ ਸਮਝ ਨਹੀਂ ਆਇਆ। ਜਦੋਂ ਉਸ ਨੇ ਆਪਣੇ ਕੰਨ ‘ਤੇ ਹੱਥ ਲਾਇਆ ਅਤੇ ਜ਼ਮੀਨ ਵੱਲ ਵੇਖਿਆ ਤਾਂ ਉਸ ਨੂੰ ਪਤਾ ਲੱਗਾ ਕਿ ਸਨੇਚਰ ਉਸ ਦੀ ਬਾਲੀ ਲੈ ਕੇ ਭੱਜ ਗਏ ਹਨ। ਇਸ ਤੋਂ ਬਾਅਦ ਮਹਿਲਾ ਨੇ ਸ਼ੋਰ ਮਚਾਇਆ ਕਿ ਬਾਈਕ ਸਵਾਰ ਉਸ ਦੀ ਬਾਲੀ ਲੈ ਕੇ ਭੱਜ ਗਏ ਹਨ, ਪਰ ਤਦ ਤੱਕ ਸਨੇਚਰ ਘਟਨਾ ਸਥਾਨ ਤੋਂ ਕਾਫ਼ੀ ਦੂਰ ਨਿਕਲ ਚੁੱਕੇ ਸਨ।
ਇੱਕ ਹੋਰ ਸੀਸੀਟੀਵੀ ਫੁਟੇਜ ਵਿੱਚ ਦਿਖਾਇਆ ਗਿਆ ਹੈ ਕਿ ਉਹ ਬਾਈਕ ਸਵਾਰ ਪਹਿਲਾਂ ਮਹਿਲਾ ਦੀ ਰੇਕੀ ਕਰਦੇ ਹਨ, ਫਿਰ ਕੁਝ ਦੂਰੀ ਤੋਂ ਬਾਈਕ ਮੋੜ ਕੇ ਵਾਪਸ ਆਉਂਦੇ ਹਨ ਅਤੇ ਬਾਲੀ ਝਪਟ ਕੇ ਭੱਜ ਜਾਂਦੇ ਹਨ। ਤਿਉਹਾਰੀ ਮੌਸਮ ਵਿੱਚ ਪੁਲਿਸ ਵੱਲੋਂ ਸ਼ਹਿਰ ਵਿੱਚ ਸਖ਼ਤ ਚੌਕਸੀ ਦੇ ਬਾਵਜੂਦ ਅਜਿਹੀਆਂ ਵਾਰਦਾਤਾਂ ਹੋਣਾ ਕਈ ਸਵਾਲ ਖੜ੍ਹੇ ਕਰ ਰਿਹਾ ਹੈ।
Related
